سئچگی لر
عمومیتده کیچیک شهرلرده، کئچمیش زامانلاردان قایدادیر سئچگیلر قونوسو تئزراق باشلانیر و قاباریق شکیلده جوربه جور انسانلار، ایستر-ایسته مز اؤزلرینی موضوعا قاتیرلار و مخالف فکیرلر بیر بیری ایله اوزون سوره جده(مدّتده) دارتیشیرلار و گاهدان عقل و منطقه دایانمادان اؤزلرینی و خلقی یورورلار؛ بیزیم ورزقاندا دا ایندی دن ملت وکیللری نین تبیلیغلری! باشلانیب و بعضی دوستلار دئمیشکن سئچگیلرین قیزدیرماسی(انتخابات تبی) قووزانیب، کاندیدلرین پرستشکارلاری و طرفدارلاری چالیشیرلار بیرینی ییخالار، بیرینی قالدیرالار، بیرینی ازه لر، بیرینی دوزه لر، بیرینه یامان دئیه لر، بیرینه یاخشی دئیه لر و ...
من ده بیر یاندان سیاستده الیم اولمادیغینا گؤره، هئچ بیرینی رد و یا تأیید ائتمیرم و هامیسینا اوغور و موفقیت آرزولاییرام! آخی ورزقان جماعتی نین آزیندان یوزده یوز اوتوزو( %130 ) رأی وئریرلر،انشالله هامیسینا چاتار! فقط بونو بیلیرم کی –هئچ اولماسا بیزیم علیاردا- ایندییه کیمی جوجه ننه سیندن سوت گؤمویوب! بیر یاندان دا بو کاندیدلره جیجیگیم گلیر و کاندید اولماغا وسوسه اولورام، آخی بیلیرسیز دااا هر شئی هرشئی اولا بیلر .. میخی میسمار ائلییه ن وار! بوناگؤره ده فکیرله شیرم کی کاندید اولسایدیم ایندی گرک نه ایش گؤره یدیم؟ خلقه نه دئیه یدیم؟ نه سایاق اؤزومو تبیلغ ائده یدیم؟
نه باشیزی آغریدیم نهایت بیزیم بؤلگه وئبلاگلاری نین بو مسئله یه هئراغاج(ائرکن-تئز) دقت یئتیرمکلری –البته مسئولیت دویاراق و بؤلگه یه اورکلری یاناراق- منی ده شهر سویّه سینده بیر ورزقانلی اولاراق بو دوروما گتیردی چیخاردی کی آشاغیداکی مثنوینی یازماقلا اؤز ادبی و مدنی بورجومو اؤده ییم، البته یئنه ده وورغولاییرام منیم منظوروم محترم کاندیدلرین هئچ بیریسی دئییل یالنیز و یالنیز اؤزومم! یعنی بونو یازدیم کی بیرگون کاندید اولسام خوش خط ایله یازدیریب دروازالاردان آسلایام یا دااا بوروشور کیمی چاپا وئریب خلقه داغیدام یادااا cd-یه ووردوروب ائولره پایلایام یا دااا وئرم دوستلاریم قویالار وئبلاگلارینا، البته ایسپانسئرین تاپاندان سونرا! توکّل آللها.
یئتیشیب سئچگیلرین واختی یئنه
گتیریب چوخلاری نین باختی یئنه
تؤکولوب کوچه لره کاندیدلر
دولور اوچ وعده بوتون مسجیدلر!
هره بیر عده ییغیبدیر باشینا
هله باخمیر قوروسو یا یاشینا
ساییر اؤز گؤرمه دیگی ایشلرینی!
اؤز ایچینده قیجیدیر دیشلرینی!
اوتوز ایلده گؤرولن هربیر ایشی
چیخیری اؤز آدینا مشدی کیشی!
هنری، صنعتی ده، معدنی ده
جیگری، قورساغی دا، معده نی ده!
متخصص فقط ایراندا بودور
کره ده، سوتده، هم آیراندا بودور!
دئییر هر کتده(کندده) ده بیر باه(بانک) وورارام
آخی ایللردی کی من باه(بانک) وورارام!
یئر نه دیر؟ من هاوادان یول چکرم!
قایادا، داشدا دا قارپیز اکه رم!
منه یاردیم ائده نه ایش وئره رم
دمیری کسماغا دا دیش وئره رم!
ائوه هئچ... طووله یه ده گاز چکه جم
قلمیم له قیشیزی یاز چکه جم!
گتیریب گزدیره جم من وزیری
توی-دویون، ختمی، یاسی هم حضوری
داغ باشیندا تیکرم کارخانالار
قوی سئوینسینلر اوشاقلار، آنالار
بو رئیسلرده کی یوخدور باجاریق
اول آلله عوضین بیز آچاریق
تایفامیزدا واریمیز کلله لی چووووووخ
من اؤزوم حل ائده رم غوصه سی یوخ!
مدرسه یوخدو فیلان کندده؟ اوخ، آه
آچارام اوردا اؤزوم دانشگاه
منه هرکیم سالا رأی تاپدی نجات
قیزیلا، ارزه ده مندن دی ثبات!
اینان اووچو دوراجاقدیر آشیغیز
یئنه میسدن اولاجاق قاب-قاشیغیز
من ایله آخیره تک اولسا هامی
وئره رم خلقه مولیبدن سهامی!
سویو من آخدیرارام اوز یوخاری
چیخارام پیلله لری دوز یوخاری!
بو ورم، شیش دی، تورّومدو نه دی؟
گومانیمجا بو منیم، مسخره دی!
بیزیم ائوده بونون هئچ معنیسی یوخ!
آما چون اینجیدیری سیزلری چوخ،
اونو بیرگونده یئتیررم صیفیره
اوزو اولماز چیخا بیرده ائفیره!
همده هرکس مایا قویسا بیله مه
اونو ترجیح ائده رم گؤزگیله مه
اونا تقدیم ائده رم پست و مقام
تؤکه رم خیرتده یینه بیر دولو جام،
اؤزو ایچون بو نه تکجه نوش اولار،
یئددی نسلی اوتومات سرخوش اولار!
بئله جه اؤلکه ده بوللوق ائده ریک
بو جفاکش ائله قوللوق ائده ریک
بو ائلین حقی دی دادسین پیلووی
رستورانلاردا آشیرسین چیلووی!
صاندیق اوستونده کاباب دیزدن دی
گل-گئدین خرجی بوتون بیزدن دی
منجه، پاک ، مجلیسه بیز گیرمه لی ییک،
یعنی رأیین ده پولون وئرمه لی ییک!
منه هرکیم سالا رأی تاپدی نجات
اؤلولر روحونا عالی صلوااات!
اکبر حمیدی علیار
21/10/90
علیارین مایی داغی یاز فصلینده