اؤتن هفته­نین بازار ائرته­سی و آرا گونلرینده باکی شهرینده حسین جاوید اولوسلارآراسی کونفرانسی کئچیریلدی. کونفرانس آذربایجان ملی علم­لر آکادئمییاسی و حسین جاویدین ائو موزئیی­نین اورتاق گیریشیمی ایله ایکی گون عرضینده چئشیتلی مکانلاردا کئچیریلمیش­دیر.

بیرینجی گون (1/8/96) سحر ساعاتلاریندا حسین جاوید پارکیندا جاویدین هئیکلی اؤنونه گول قویماقلا کونفرانسین آچیلیشی اولدو. سونرا آکادئمییانین سالونوندا ساعت بیره قدر داوام ائتدیریلدی. آکادئمیک تئیمور کریملی­نین آپاریجی­لیغی­ایلا کئچیریلن تدبیره آذربایجان ضیالی­لاری، یازیچیلاری، آراشدیرماچی​لاری و آکادئمیک­لریندن علاوه، تورکیه، میصر، اوزبکیستان، بولغاریستان و باشقا اؤلکه­لردن ده معروضه​چی­لر قاتیلمیشدی. اؤلکه­میزین (ایرانین) یئگانه تمثیلچی­سی یازیچی، شاعر و ترجمه­چی اکبر حمیدی «علیار» اولموشدور.

چیخیش ائدنلر جاویدین اثرلرینده اولان معنوی، اخلاقی، عموم­بشری ایدئیالاریندان، دیه­رلردن دانیشدیلار. اونلار جاویدین آچیلمایان جهتلری​نین آراشدیریلماسی­نین گره­ک​لیینی وورغولایاراق چئشیتلی قونولاردا ماراقلی مقاله­لر اوخودولار. اؤلکه­میزین دعوتلیسی علیار جنابلاری اسلام دونیاسی­نین بؤیوک فیلوسوفو، متفکری، دراماتورقو ساییلان جاوید افندی­نین اثرلری​نین، ایدئیالاری​نین ترجمه واسطه­سی ایله دونیایا چیخاریلماسی­نین واجیب­لیینی قید ائده­رک اونون اثرلری­نین ایران نشرلریندن دانیشدی. دئمه­لی­ییک اکبر علیار بوگونه کیمی بؤیوک جاویدین «پیغمبر»(ص)، «شیخ صنعان» و «مارال» اثرلرینی فارسجا ترجمه­سی ایله ایراندا نشر ائتدیرمیش­دیر.

کونفرانسین ایکینجی بؤلمه­سی همن گون ناهاردان سونرا حسین جاویدین ائو موزئیینده داوام ائتدیریلدی و چیخیش ائدنلر آخشام ساعت 6-یا قدر اشتراکچی­لارین سورولارینی جاوابلادیلار.

صاباحیسی گون (2/8/96) حسین جاوید پارکیندا جاویدین هئیکلی اؤنونده تدبیرین داوامی اولدو. آچیق اورتامدا (فضادا) کئچیریلن تدبیری آپاران علم­لر آکادئمییاسی­نین رهبری پروفسور عیسا حبیب­بأیلی ایدی. بو حیصه­ده دانیشیقلاردان باشقا، حسین جاویدین «کور عرب» ماهنیسی و بیر نئچه باشقا شعری ده موسیقی ایله موغام اوستالاری ملک خانیم و آلما خانیم طرفیندن سسلندیریلدی.

کونفرانسین سون حیصه­صی ناهاردان سونرا آذربایجان دؤولت مدنیت و اینجه­صنعت بیلیم یوردوندا اوستادلار و اؤیره­نجی​لرین اشتراکی ایلا کئچیریلدی.

قید ائتمه­لی­ییک اؤلکه­میزین تمثیلچی­سی اکبر علیارین هر دؤرد یئرده چیخیشی اولموشدور. او همده گلن ایللرده حسین جاوید آدینا اولوسلارآراسی موکافاتین تأسیس ائدیلمه­سینی اؤنرمیش­دیر.

 Akbar Əlyar adlı şəxsin şəkli.